Поранешниот фудбалер на Ливерпул, Џермејн Пенант се здобил со повреди на ногата откако за време на прошетка бил нападнат од германски овчар. Пенант се обидел да го заштити своето куче Кинг, од расата американска акита, но потоа и самиот бил нападнат од другото куче. Завршил во болница, каде што му биле ставени повеќе од 50 шевови поради повредите од каснувањата.
Пенант за британскиот весник „Сан“ открил како дошло до нападот. Тој објаснил дека најпрво се обидел да спречи судир меѓу двете кучиња, но германскиот овчар потоа се нафрлил врз него. Фотографиите што ги објавил Пенант ги покажуваат сериозните повреди на неговата десна потколеница.
Лекарите му санирале четири рани од каснувања, а поради една поголема повреда го предупредиле дека можеби ќе мора да оди и на операција.
„Беше навистина застрашувачки. Другото куче го нападна Кинг, па се вмешав за да го заштитам. Следното нешто на кое се сеќавам е дека кучето се нафрли врз мене. Завршив на земја, а кучето ми ја држеше ногата во вилиците најмалку пет секунди“, раскажал Пенант, додавајќи дека нема намера да го пријави нападот во полиција.
Пенант е поранешен англиски фудбалер кој во текот на кариерата настапуваше за Арсенал, Ливерпул, Бирмингем сити, Лидс јунајтед, Портсмут и Стоук сити. Професионалната кариера ја заврши во 2018 година, на 35-годишна возраст, по 17 години играње фудбал. Во Премиер-лигата забележа 231 настап.