Бразил доживеа елиминација уште во осминафиналето на Светското првенство, откако загуби од Норвешка со 2-1, а легендарниот Роналдо без двоумење ги посочи виновниците за неуспехот.
Поразот во Бразил е доживеан како големо разочарување. Сонот за шестата светска титула повторно остана неостварен, а селекцијата предводена од Карло Анчелоти го заврши настапот многу порано отколку што очекуваше јавноста.
Легендарниот напаѓач беше исклучително директен во својата анализа. Според него, елиминацијата не може да се сведе на една грешка, промашен пенал или квалитетот на Ерлинг Халанд, туку причините лежат во одлуките на селекторот.
„Морам да бидам искрен. Мислам дека ова испаѓање почна од одлуките на клупата. Карло Анчелоти е еден од најдобрите тренери во историјата на фудбалот, но вечерва направи премногу грешки“, изјави Роналдо.
Посебно го изненадила одлуката Жоао Педро воопшто да не биде дел од бразилската репрезентација на турнирот.
„Сè уште не разбирам зошто Жоао Педро не беше дел од оваа селекција. Имаше извонредна сезона, беше во одлична форма, а на Бразил му требаше напаѓач кој може да понуди нешто поинакво“, додаде тој.
Роналдо го спомена и младиот Ендрик, кој доби мала минутажа на Мундијалот.
„Погледнете го Ендрик. Секогаш кога влегуваше во игра на овој турнир, носеше енергија, агресивност и непредвидливост. Сепак, најголемиот дел од Светското првенство го помина на клупата. Тоа не можам да го разберам“, порача легендарниот Бразилец.
На удар на критиките се најде и Винисиус Жуниор. Според Роналдо, ѕвездата на Бразил не го оправдала своето реноме на Светското првенство.
„Сите знаеме колку е талентиран Винисиус, но ова не беше добро Светско првенство за него. Во ниту еден момент не изгледаше како играч што доминира во клупскиот фудбал. Кога на Бразил најмногу му беа потребни неговите најголеми ѕвезди, тој едноставно не успеа да се наметне“, изјави Роналдо.