Влогот од натпреварот беше голем, па двете страни беа претпазливи на почетокот. Сосема очеквуано, избраниците на Пеп Гвардиола го имаа поседот на топката, додека пак домаќините трпеливо ја чекаа својата шанса преку контранападите.
Возбудувања се случија кон финишот на првиот дел, кога за неколку минути паднаа два гола, по еден на двете страни.
Најпрво Давид Силва најдобро се снајде по една мешаница од прекин и го матираше својот сонародник Де Геа за 0-1 во 43. минута.
Но пред судијата да означи полувреме, одбраната на гостите киксираше и му овозможи на Рашфорд да донесе 1-1 во втората минута од надополнувањето.
Манчестер Сити се врати во водство на стартот од вториот дел, во слична акција како од првите 45 минути, домаќините лошо расчистија една нафрлена топка, која на крајот стигна до Отаменди и дефанзивецот без проблем ја затресе мрежата на Де Геа.
„Црвените ѓаволи“ потоа се обидоа да стигнат до бод, кон финишот од средбата имаа прекрасна двојна шанса, Најпрво Лукаку не успеа да се прослави и од пет метри биеше право во Едерсон. До одбиената топка прв стигна Мата, но и Шпанецот го погоди само голманот на „Граѓаните“.
На крајот Манчестер Сити славеше победа, со која испиша историја, ова е 14. триумф во низа во една езона во Премиерлигата. „Граѓаните“ исто така направија +11 на врвот на табелата, и уште сега може да се каже дека со една рака го имаат шампионскиот трофеј.