Португалскиот стратег Жозе Мурињо повторно се поврзува со враќање во Премиер лигата, овојпат како можен нов тренер на Њукасл Јунајтед.
Актуелниот тренер на Бенфика е високо ценет од раководството на англискиот клуб, кое смета дека токму тој би можел да донесе нова димензија и да го вклучи тимот во борба за трофеи. Според британските медиуми, неговото искуство и победнички менталитет се гледаат како клучни фактори за амбициите на клубот.
Мурињо зад себе има богата кариера исполнета со трофеи, вклучувајќи шампионски титули во Англија и Италија, како и два пехара во Лига на шампиони. Тој е препознатлив по својата способност да изгради силен тимски дух и да извлече максимум од играчите.
Во меѓувреме, Њукасл минатата сезона стави крај на долгата трофејна суша освојувајќи го Карабао куп, што беше нивни прв домашен трофеј по цели седум децении. Дополнително, клубот успеа да обезбеди настап во европските натпреварувања во две од последните три сезони.
Сепак, тековната сезона не се одвива според очекувањата. Тимот се најде во долниот дел од табелата, што го зголеми притисокот врз тренерот Еди Хау и ги засили гласините за можни тренерски промени на „Сент Џејмс Парк“.
Во исто време, шпанските медиуми шпекулираат дека Мурињо е меѓу кандидатите и за клупата на Реал Мадрид, што дополнително ја прави неизвесна неговата следна дестинација.