Англија со победа од 4:2 над Хрватска го отвори настапот на Светското првенство, а еден од клучните моменти на натпреварот беше досудениот и повторениот пенал од кој Хари Кејн донесе предност за својата репрезентација.
Капитенот на Англија беше прецизен од вториот обид откако неговиот прв удар го одбрани Доминик Ливаковиќ. Сепак, по реакција од ВАР беше утврдено дека хрватскиот голман прерано ја напуштил гол-линијата, па пеналот беше повторен.
По натпреварот, англискиот напаѓач откри дека внимателно го анализирал начинот на кој реагира хрватскиот чувар на мрежата.
„Гледајќи снимки, забележав дека често тргнува порано, па знаев дека постои можност да излезе од линијата ако направам залет со мало застојување. Бев околу 80 проценти сигурен дека беше надвор од линијата, а при повторениот пенал малку ја сменив техниката и тоа ми се исплатеше“, изјави Кејн.
Според правилата, голманот во моментот на изведување на пеналот мора да има најмалку едно стапало на гол-линијата или над неа. Снимките покажаа дека Ливаковиќ се придвижил дел од секунда порано од дозволеното.
Сепак пеналот ќе беше повторен дури и доколку хрватскиот голман останеше на линијата. По неговата одбрана, одбиената топка стигна до Јошко Гвардиол, кој ја расчисти опасноста, но снимките покажаа дека и тој прерано влегол во шеснаесетникот додека Кејн го изведуваше ударот од белата точка.