Реал Мадрид вчера со 3-1 ја доби пресметката со ПСЖ во првиот натпревар од осминафиналето во Лигата на шампионите.
Кристијано Роналдо беше двоен стрелец и стигна до бројката од 101 погодок во најелитното европско натпреварување. Првиот гол го постигна од пенал, кој предизвика голема дебата на социјалните мрежи.
Причина е тоа што на успорена снимка се гледа како топката мистериозно отскокнува пред ЦР7 да шутне.
Многумина пишуваат дека ова e чудо, но АС има објаснување за овој трик на Португалецот. Весникот вели дека Роналдо со левата нога силно удира на теренот, тревата вибрира до тој степен што топката се подигнува точно во моментот кога играчот со десната шутира.
Се чини дека оваа логика ја поддржува и изјавата на Рио Фердинанд, кој истакна дека Кристијано го правел ова и на тренинзите во Манчестер јунајтед.
Потегот воопшто не е нелегален, бидејќи во ниту еден момент нема двоен допир на топката.