„Сините“ не се откажуваат од топ четири финиш, избраниците на Конте вечерва стигнаа до тешко издвојувана победа на гостувањето кај Свонси.
Резултатот беше отворен по само четири минути игра. Кинг изгуби топка на средината од теренот, Азар го проигра Фабрегас, кој мајсторски пласираше со лева за 0-1. По раното водство, Челси не се закануваше посериозно, а домаќините го искористија ова и во продолжението од средбата го ставија противникот под силен притисок. „Сините“ грчевито се бранеа но Куртоа беше сигурен на голот и не дозволи неговата мрежа да биде затресена.
Со овие три бода, Челси се доближи на -2 во однос на Тотенхем, сепак „Спарси“ во понеделник го играат својот натпревар. Но и Ливерпул може да биде вмешан во трката откако денеска одигра само 0-0 со Стоук. Следниот понеделник „Црвените“ гостуваат на Стемфорд Бриџ, па завршницата од Премиерлигата ќе биде интересна.
Што се однесува до Свонси, овој пораз ги остави „Лебедите“ на само +1 над зоната за испаѓање откако Саутемптон денеска триумфираше со 2-1 над Борнмут.