Манчестер јунајтед за сума од околу 40 милиони фунти го купи Немања Матиќ од Челси.
„Манчестер јунајтед со задоволство може да соопшти дека потпиша со Немања Матиќ од Челси тригодишен договор со опција за продолжување на уште една“ – се вели во соопштението на клубот.
Жозе Мурињо е задоволен од засилувањето, тој доаѓа токму по негово барање.
„Немања е фудбалер на Манчестер јунајтед и на Жозе Мурињо. Тој претставува се што сакаме од еден фудбалер, лојалност, конзистентност, амбиција и тимски играч. Сакам да му заблагодарам за неговата желба да дојде кај нас бидејќи без тоа ќе беше невозможно да го имавме тука. Сигурен сум дека играчите и навивачите ќе го сакаат. Големо добредојде за новиот играч со број 31“ – изјави Жозе Мурињо.
Српскиот фудбалер е среќен што повторно ќе соработува со Португалецот.
„Среќен сум што доаѓам во Манчестер јунајтед. Да работам уште еднаш со Жозе Мурињо е шанса која не можев да ја одбијам. Уживав во Челси и сакам да му се заблагодарам на клубот и фановите за нивната поддршка. Не можам да дочекам да ги запознаам моите нови соиграчи и да почнам да работам со нив“ – изјави Немања Матиќ.
„Ова е многу возбудлив период за клубот и сакам да помогнам во креирање на уште историја за овој голем клуб“.
Матиќ е трето засилување за Манчестер јунајтед во летниот преоден рок, претходно во клубот дојдоа Лукаку и Линделоф.