Капитенот на саудискиот Ал-Наср и португалската фудбалска легенда, Кристијано Роналдо, започнува ново поглавје во својата кариера. Еден од најдобрите фудбалери на сите времиња реши да влезе во светот на телевизиската продукција, работејќи на нова серија.
Роналдо на својот официјален профил на Инстаграм објави фотографија со познатиот британски режисер и продуцент Метју Вон, откривајќи дека започнала продукцијата на неговата прва телевизиска серија, насловена „Day 1s“.
„Одлични вести! Продукцијата на мојата прва телевизиска серија ‘Day 1s’ штотуку започна. Наскоро следуваат повеќе информации“, напиша Португалецот.
Според досегашните информации, Роналдо нема да биде само дел од продукцијата, туку и самиот ќе се појави во серијата. Покрај него, во проектот ќе учествува и поранешната ѕвезда на Арсенал и Барселона, францускиот ас Тјери Анри. Во првата епизода би можел да се појави и познатиот британски рапер Дејв.
Снимањето започнало во Лондон во изминатите месеци, но официјалниот датум на премиерата сè уште не е објавен.
Оваа најава доаѓа кратко откако Роналдо стави крај на својата репрезентативна кариера, завршувајќи го 23-годишниот пат во дресот на Португалија, кој започна со неговиот дебитантски настап во 2003 година.
Во репрезентативната кариера забележа 234 настапи и 146 голови, а освои и три големи трофеи. Меѓу нив се издвојуваат европската титула во 2016 година и два трофеи во Лигата на нации на УЕФА.