Шпанскиот фудбалер Рафа Мир е осуден на осум години и шест месеци затвор поради сексуален напад, соопшти Покраинскиот суд во Валенсија.
Според пресудата, која сѐ уште не е правосилна и може да биде обжалена, Мир добил седум години затвор за сексуален напад и дополнителни 18 месеци за нанесување телесни повреди. Покрај затворската казна, му е изречена и забрана да ѝ се приближува на жртвата на помалку од 500 метри во период од 10 години, како и обврска да исплати вкупно 64.000 евра отштета.
Во истиот случај е осуден и фудбалерот Пабло Хара, кој доби две години и шест месеци затвор поради сексуален напад и кривично дело против моралниот интегритет.
Судот исто така нареди истрага за можно лажно сведочење поврзано со постапувањето на припадници на локалната полиција во Бетера, кои првично биле вклучени во случајот.