Манчестер Сити беше под императив на победа во мечот на сезоната со Ливерпул и успеа да дојде до неа. Двата тима одиграа на највисоко ниво, а нијанси го одлучија победникот.
Возбудувањата почнаа во 18. минута кога Мане ја погоди стативата, а играчите на Сити лошо избија и само за точно еден сантиметар не си постигнаа автогол. Ливерпул немаше среќа да поведе.
Манчестер Сити не создаде многу шанси во првиот дел, но на пет минути до полувремето една топка дојде до Агуеро кој мајсторски од косо ја смести под пречката на Алисон за водство од 1-0.
Во 63. минута прекрасна акција на Ливерпул, Александер Арнолд прекрасно го проигра Робертсон кој асистираше до Фабињо а тој постигна гол за изедначување на 1-1.
Нерешениот резултат траеше до 72. минута кога Сане со помош на стативата постигна гол за ново водство на Манчестер Сити, овој пат од 2-1.
Десет минути подоцна домаќините имаа фантастична шанса да го заклучат мечот, но Алисон со чудесна интервенција спречи Агуеро да постигне гол.
До крајот на мечот Ливерпул со сите сили се обидуваше да го израмни резултатот, но Манчестер Сити со пожртвувана игра успеа да се одбрани и да дојде до многу важна победа.
Манчестер Сити со овие три бода повторно се искачи на второто место на табелата, има четири помалку од Ливерпул кој и понатаму има значителна предност.