Во пресрет на ждрепката за групната фаза од Лигата на шампионите, која е во четврток во 18 часот, Реал и Ливерпул се сигурни дека барем една нивна потенцијална средба нема да се случи. Новото правило на УЕФА спречува евентуален нивен дуел на Енфилд во првата фаза од натпреварувањето.
Европската фудбалска федерација воведе промена во пресрет на ждрепката за да избегне повторување на исти натпревари во групната фаза трета сезона по ред. Според новото правило, натпреварите што се играле во претходните две изданија на Лигата на шампионите ќе бидат „блокирани“ на претстојната ждрепка доколку станува збор за истиот домаќин.
Оваа одредба директно се однесува на Реал и Ливерпул. Мадридскиот тим гостуваше на „Енфилд“ во последните две сезони од Лигата на шампионите. Во сезоната 2024/25 загубија со 2:0, а минатата сезона беа поразени со 1:0. Поради тоа, Реал е сигурен дека оваа сезона нема повторно да му гостува на Ливерпул.
Правилото сепак содржи клучен детал. Иако Ливерпул и Реал Мадрид не можат да играат на „Енфилд“, нивната средба е можна на стадионот „Сантијаго Бернабеу“. УЕФА сака да спречи повторување на натпреварот на истиот стадион, а бидејќи претходните два дуела се играа во Англија, се отвора можност средбата да се одржи во Мадрид. Тоа значи дека Реал сигурно нема да му гостува на тимот на Андони Ираола, но би можел да го пречека како домаќин.
Важно е да се напомене дека правилото се однесува исклучиво на групната фаза од натпреварувањето. На пример, иако Реал и Манчестер Сити се среќаваа во речиси секоја од последните осум сезони во Лигата на шампионите, тие средби се одвиваа во нокаут-фазата, па тука нема промени. Доколку патиштата повторно им се вкрстат, натпреварот ќе мора да се одигра.
Во случајот на Барселона, оваа сезона нема „забранети“ натпревари бидејќи во изминатите две години не играше против исти ривали. Сепак, доколку Барселона оваа сезона игра против ПСЖ на домашен терен, таа средба нема да може да се повтори во групната фаза од сезоната 2027/28, бидејќи веќе се сретнаа на „Монжуик“ минатата сезона.