Се чини дека Барселона ќе мора да се раздели со неколку фудбалери ако сака да донесе свежи имиња во тимот ова лето. Според шпанските медиуми, четворица играчи се наоѓаат на излезната врата: Роналд Араухо, Андреас Кристенсен, Ансу Фати и Фермин Лопез.
Младата надеж на Каталонците, Фермин Лопез, имаше тешка сезона во која не успеа целосно да се наметне кај новиот тренер Ханси Флик. Иако просечно добиваше околу 40 минути по натпревар, Лопез успеа да впише шест гола и осум асистенции на 42 настапи. Неговиот учинок не помина незабележано – интерес за него покажуваат клубови од Саудиска Арабија, кои наводно се подготвени да му понудат плата од осум милиони евра по сезона. Според „Релево“, Барселона би размислила за продажба, но само доколку пристигне понуда повисока од 60 милиони евра – сума на која го проценува и „Трансфермаркт“. За 22-годишниот плејмејкер интерес покажувале и неколку премиерлигаши во текот на сезоната.
Фермин не е единствениот што би можел да се пресели на Блискиот Исток – клубовите од Саудиска Арабија внимателно го следат и Рафинја. Сепак, шансите за трансфер на Бразилецот се мали бидејќи Барселона планира да му понуди нов договор во следните неколку недели.
Дали Барса ќе попушти под финансискиот притисок или ќе се обиде да ги задржи младите таленти – останува да видиме.