Елиф Елмас вели дека нему, но и на сите фудбалери им е многу тешко поради серијата лоши резултати на македонската фудбалска репрезентација.
Македонија имаше уште едно очајно издание денеска, не создадовме ниту една сериозна шанса против Шкотска и загубивме со 0-2.
Веќе седум меча по ред немаме постигнато гол, а на 11 во серија немаме победа.
„Реално беше многу лошо денеска, многу е тешко, тешко е да се зборува. Заслужено победи Шкотска. Ние сме во многу тежок момент. Сега на сите играчи им е тешко, мене ми е многу тешко, треба да научиме од оваа тешка ситуација. Од седум натпревари, ниту една победа и нула постигнати голови, мора нешто повеќе да се направи. Тоа е фудбалот, мора да се кренем од ова, ако не ќе биде уште потешко. Ние сите сакаме да победиме, треба да ни е јасно дека сме испод нивото на оваа група. Мора максимално да бидеме фокусирани и максимално да работиме. Да извадиме максимум од наредниот натпревар и да се спремиме за ноември. Мора многу повеќе да работиме“, изјави Елмас.
Следниот натпревар на Македонија е во вторник, на гостински терен кај Швајцарија.