Легендарниот Роберто Карлос ќе остане запаметен пред сè по својот разорен шут и головите од прекин, но 53-годишниот Бразилец сега зборуваше и за проблемите во приватниот живот.
Минатиот декември Роберто Карлос имаше проблеми со срцето, кои беа откриени по преглед на ногата.
За среќа, сè помина како што треба. Прославениот лев бек појасни дека не доживеал срцев удар како што се шпекулираше, но сега се соочува со финансиски проблеми.
„Ми ја испразнија сметката“, започна Роберто Карлос, раскажувајќи како изгубил повеќе од 160 милиони евра. Поранешниот бразилски фудбалер ги открил проблемите со својот поранешен агент и членовите на семејството, поради кои, како што вели, изгубил речиси сè што заработил во кариерата.
„Имав проблеми со луѓе кои ми ја испразнија банкарската сметка. Поради агенти и семејни проблеми изгубив 99 отсто од сè што заработив од фудбалот.“
Поранешниот ас раскажал дека речиси целата заработка што ја стекнал во текот на кариерата, повеќе од 160 милиони евра, исчезнала поради неговиот поранешен агент.
„Имав сериозен проблем со него. Имав и многу сериозен семеен проблем. Во четвртокот легнав да спијам на полноќ, а во петокот добив куп документи за кои воопшто не знаев дека постојат. Тогаш сфатив дека ја изгубив целата своја историја.“
За крај, тој упати порака до младите.
„Правев грешки и затоа ги молам најмладите да не го прават истото. Секогаш размислував за плановите за иднината по завршувањето на играчката кариера. Станува збор за градење сопствена приказна како играч и искористување на сопствениот лик. Кога решив да го напуштам фудбалот, веќе имав лиценца за спортски директор и работев со многу брендови“, истакна Карлос.