ФИФА направи неочекуван, но интересен потег пред Светското првенство во 2026 година. Светската фудбалска организација го именуваше словенечкиот кошаркар Лука Дончиќ за официјален амбасадор на Мундијалот што ќе се одржи во САД, Канада и Мексико.
Со овој избор, ФИФА сака да ја поврзе енергијата на различни спортови и да го приближи фудбалот до уште поширока публика, особено кај младите. Дончиќ, една од најголемите ѕвезди на НБА лигата, ќе има задача да го промовира турнирот преку различни кампањи и настани ширум светот.
„Ми претставува голема чест што ФИФА ми ја доверува оваа улога. Светското првенство е најголем спортски настан на планетата, и сум возбуден што ќе можам да придонесам за неговата промоција и успех“, изјави Дончиќ.
Светското првенство во 2026 ќе биде историско, бидејќи првпат ќе се организира во три земји. Очекувањата се дека турнирот ќе собори рекорди по број на гледачи, а Дончиќ ќе биде едно од лицата што ќе го претставува овој глобален спектакл.