Валдес имаше фантастична кариера во Барселона со која освои шест трофеи во Примера и три титули во Лигата на шампионите, но откако си замина од Камп Ноу почна да оди во надолна линија.
35-годишниот голман е без клуб од мај откако го напушти Мидлсброу. Иако имаше понуди за продолжување на кариерата од други клубови, тој на новогодишните денови одлучи да ја информира јавноста дека се пензионира.
На својот твитер профил тој напиша: „Благодарам за се“. Тоа е последното нешто што ќе го слушнат фановите од него.
Потоа тој го избриша својот твитер акаунт и сите фотографии објавени на неговиот инстаграм профил.
Ваквиот потег на Валдес не е случаен, тој во 2015 година во интервју за РАЦ1 најави дека кога ќе се пензионира од фудбалот ќе се исклучи од светот, ќе ги избрише сите профили на социјалните мрежи и ќе се фокусира на својата фамилија.
„Кога еден ден светлата ќе згаснат, тогаш ќе бидам со моите деца, ќе ги учам за животот. Се надевам дека кога светлата ќе згаснат, ќе биде тешко да ме најдат“, изјави тогаш Валдес.
