Лионел Меси донесе одлука да стави крај на својата богата репрезентативна кариера и повеќе нема да го носи дресот на националниот тим на Аргентина.
Меси во официјалното соопштение откри дека одлуката ја донел кратко по одиграното финале на Светското првенство против Шпанија, а настаните што следувале дополнително му потврдиле дека е вистинско време за збогување со националниот дрес.
„По сето ова време од финалето и по многу размислувања, сакам на сите да им кажам дека се повлекувам од репрезентацијата. Тоа е нешто што ме боли, но сфаќам дека ова е вистинскиот момент. Се колнам дека секогаш го давав најдоброто од себе, не само во последните години, кога освоивме сè, туку и порано. Секогаш се борев и давав сè за овој дрес, за да ве направам среќни и горди што сте Аргентинци преку фудбалот“, порача Меси.
🚨🚨🎙️| Lionel Messi’s official statement:
— CentreGoals. (@centregoals) August 31, 2026
“After all this time since the final, and after thinking about it a lot, I want to tell everyone that I’m retiring from the national team…
"It was a decision that hurt and still hurts deep inside, but I understand that this is the… pic.twitter.com/H2SyZ9EByP
Во своето писмо, Меси истакна дека е време за смена на генерациите и дека дресот треба да им го остави на помладите играчи.
„Нема уште многу време и различни поглавја се ближат кон својот крај. Ова е едно од оние што многу ме боли. Ја сакам, ја сакав и секогаш ќе ја сакам можноста да бидам дел од репрезентацијата. Давав сè што имав и веќе немам што да дадам. Исто така, доаѓаат одлични млади играчи кои заслужуваат да бидат тука.
Ви благодарам за сета љубов во текот на овие 20 години. Ќе ми недостасува да ве слушам од теренот. Сега ќе бидам еден од вас, секогаш давајќи поддршка однадвор, во добрите моменти, а уште повеќе во лошите“, напиша Аргентинецот.
Меси им се заблагодари на своето семејство, соиграчите, тренерите и челниците на фудбалскиот сојуз за сите незаборавни моменти што ги доживеал во репрезентативниот дрес.
„Заминувам со мир и гордост, знаејќи дека заедно со моите соиграчи ви подаривме моменти за кои некогаш само сонувавме. Беше лудо да го доживееме сето ова со вас. Ве сакам! Му благодарам на Бога што ме направи Аргентинец. Напред, Аргентина!“, порача Меси.
На крајот, тој откри и кога всушност бил напишан текстот на неговото соопштение.
„Овие зборови ги напишав на 21 јули, два дена по финалето. Денес, по сè што се случи со мојот татко, уште повеќе сум уверен во оваа одлука отколку порано“, додаде Меси.
Така, Меси се збогува со дресот на „Гаучосите“ откако го оствари практично сето она што можеше да се постигне во репрезентативниот фудбал. Круна на неговата репрезентативна кариера беше освојувањето на Светското првенство во Катар, со што го исполни својот повеќедецениски сон и ја одведе Аргентина на светскиот врв.
За националниот тим одигра вкупно 207 натпревари и постигна 125 голови.