Чаирчани со одличен резултат се вратија од Загреб и ги подгреаа надежите дека можат да му приредат и целосен шок на противникот кој е апсолутен фаворит во овој двобој.
Динамо Загреб е редовен учесник во групните фази од натпреварувањата на УЕФА, па елиминација од Шкупи во квалификациите од Лигата на шампионите би било голем срам за хрватскиот тим.
„Ја прифаќаме улогата на фаворит. Динамо е навистина тоа, фаворит. Имаме почит за противникот, но ќе направиме сè за да го добиеме овој меч. Свесни сме дека Шкупи е мотивиран и деќа ќе направи сè за да не изненади“, изјави тренерот на Динамо Загреб, Анте Чачиќ.
Се очекува навивачите на Шкупи да приредат жешка атмосфера која дополнително треба да ги мотивира нивните фудбалери.
„Секако повторно хрватскиот шампион е фаворит, но ако ги погледнам овие изминати денови на кои работевме по натпреварот навистина ми даваат позитивни надежи затоа што гледам со каков мотив и елан фудбалерите го чекаат утрешниот дуел. Знам дека ќе го дадат максимумот, и се надевам со една добра игра повторно да дојдеме до добар резултат кој би не однел во следната рунда од квалификациите за ЛШ“, изјави тренерот на Шкупи, Гоце Седлоски.
Ниту една македонска телевизија не ги откупи правата за пренос на овој натпревар, па во живо ќе го гледаат тие што ќе бидат на стадионот и оние кои ќе се снајдат со стримови на интерент. За разлика од Македонија, во Хрватска мечот ќе се пренесува на ХРТ 2.