Интер со три последователни порази зад себе не влегува во најдобар момент во полуфиналето од Лигата на шампионите, но тренерот Симоне Инзаги смета дека дуелот со Барселона е посебна приказна и верува дека неговите избраници ќе покажат сосема друго лице на „Монжуик“.
Италијанскиот стратег доби критики поради слабиот резултатски период – два неуспешни настапи во Серија А и елиминација од Купот – но вели дека мотивацијата за натпреварите со каталонскиот гигант нема да изостане.
„Барселона е клуб со исклучителна традиција, можеби и најдобриот тим во светот во моментов. Имаат јасна фудбалска филозофија, квалитетни индивидуалци и силна школа. Ќе им пристапиме со почит, но уште поважно – ќе веруваме во себе,“ порача Инзаги.
Тој нагласи дека клучот ќе биде во менталната стабилност и тактичката дисциплина:
„Ќе играме храбро, нема да дозволиме да бидеме притиснати. Двете екипи се тактички подготвени и затоа очекувам интензивна и жестока битка.“
Првиот меч од полуфиналето меѓу Барса и Интер се игра вечерва (30 април) со почеток во 21:00 часот. Барселона влегува во дуелот со мала фаворитска предност, но Интер добро знае како се добиваат големи европски натпревари.
Фото/Photo: UEFA