Легендарниот француски напаѓач Тиери Анри направи интересна споредба на првите полуфинални натпревари во Лигата на шампионите, истакнувајќи ја разликата меѓу дуелот Атлетико Мадрид и Арсенал (1-1) и спектаклот меѓу ПСЖ и Баерн Минхен (5-4).
Анри потенцираше дека станува збор за два сосема различни фудбалски пристапи, но и дека двата имаат своја вредност во модерната игра.
„Во вторникот со натпреварот меѓу ПСЖ и Баерн бевме на Месечината, а ден подоцна со Атлетико и Арсенал се вративме на Земјата. Во дуелот во Париз видовме тотален фудбал, додека во Мадрид видовме фудбал, едноставно постојат различни начини да се дојде до целта. Знаеме што претставува Атлетико, а за Арсенал играњето на гости е старомодна стратегија. Во Париз се случи тоа што го очекувавме, сите уживавме и беше извонредно, но и во Мадрид го добивме она што го насетувавме, немаше многу шанси и головите паднаа по прекини од пенал. Со години се жалиме дека фудбалот станал досаден, но овој натпревар не беше воопшто досаден, навистина уживав и сигурен сум дека и гледачите дома. Напаѓачката игра беше спектакуларна, мечот на моменти беше луд и не ме интересира што одбраните не беа на највисоко ниво. Често зборуваме за тимови кои не ризикуваат, за крила кои не дриблаат и за играчи кои повеќе мислат како да не изгубат отколку како да победат, но во Париз видовме многу ризик и токму тоа го прави фудбалот возбудлив“, изјави Анри.
Реваншите од полуфиналето на Лигата на шампионите се играат следниот вторник и среда.