На прес-конференцијата во пресрет на мечот, Анчелоти беше запрашан дали Реал Мадрид може да ги освои сите шест трофеи за кои ќе игра оваа сезона: Суперкупот на Европа, Светското клупско првенство, Суперкупот на Шпанија, Ла Лига, Лигата на шампионите и Купот на Шпанија.
„Ќе дадеме се во секое натпреварување, но ќе биде тешко да ги освоиме сите шест, навистина тешко“, вели Анчелоти.
„Но, уверен сум дека имаме подобар состав од минатата сезона. Потпишавме со двајца фудбалери (Ридигер и Чуамени) кои го унапредија составот физички и технички. Конекцијата меѓу ветераните и младите би требало да биде уште подобра од лани кога се покажа како клучна“.
Анчелоти беше запрашан и дали ќе донесат напаѓач кој би требало да биде замена за Бензема кога Французинот би бил отсутен од различни причини.
„Кога нема да можете да сметате на најдобриот напаѓач во светот, тогаш е тешко да го замените со било кој фудбалер. Кога нема да може да настапи, ќе се адаптираме. Имаме многу офанзивни фудбалери, долга е листата“.