Не им е лесно на елитните тренери во најсилните клубови на светот, особено во оние каде што игра повеќе од една супер-ѕвезда.
Таква е ситуацијата во Реал Мадрид, каде што на младиот и компактен колектив кој минатата сезона ја покори Европа и Шпанија, сега се придодаде и Килиан Мбапе. На тимот во кој главни ѕвезди беа Винициус Жуниор и Џуд Белингем сенка фрли францускиот суперстар кој дојде за огромна плата и бесплатно од ПСЖ по долгогодишна сага.
Играта на Мбапе во Мадрид засега не е одушевувачка. Напротив, тој му направи проблеми на тренерот Карло Анчелоти. Искусниот Италијанец не може да најде начин да го интегрира Мбапе во играта во која сите се потчинети на колективот кога се бранат, па полесно му е да ја смени целосната тактика и филозофија, отколку да го замени Мбапе.
За пример, Килиан Мбапе во дербито против Барселона имаше истрчано „само“ осум километри, што е за неколку помалку од просекот на професионално ниво. Тоа е бидејќи не помага премногу во дефанзивата, а реалноста е дека досега немал ниту таква задача и потреба во ПСЖ и репрезентацијата на Франција…