Руд ван Нистелрој открива дека разговарал со Ерик тен Хаг по отказот кој го доби неговиот сонародник од Манчестер јунајтед, 54 годишниот стратег бил разочаран и прилично погоден.
По поразот од Вест Хем, „ѓаволите“ решија дека повеќе не можат да ги толерираат слабите резултати и во понеделникот му врачија отказ на Ерик тен Хаг.
Руд ван Нистелрој е привремено решение на кормилото додека траат преговорите за ангажман на Рубен Аморим, и забележа победа од 5-2 над Лестер во својот прв натпревар.
Поранешниот напаѓач на Манчестер јунајтед сега открива дека разговарал во два наврати со својот сонародник и вели дека Тен Хаг бил разочаран и погоден од отказот.
„Се видовме во понеделникот, а разговарав со него и во средата, пред натпреварот против Лестер. Тој е разочаран и прилично погоден бидејќи навистина го сакаше овој клуб. Уште при првиот разговор што го имав со него во преговорите да дојдам до Манчестер јунајтед, ми стана јасно колку многу тој се грижи и го обожава овој клуб“ – вели Ван Нистелрој.
„Па затоа го боли што мораше да си замине. Но во исто време е горд на постигнатото и освоените два трофеи“.