Фудбалерите на Тотнем го елиминираа фаворизираниот Манчестер Сити од осминафиналето на Карабао купот со триумф од 2-1. Средбата во Лондон понуди голови само во првиот дел, а на крајот имаше среќен крај за домаќинот.
Двајцата тренери тргнаа со комбинирани стартни состави. Резулатот по само пет минути го отвори Тимо Вернер по асистенција на Кулушевски. Шведското крило го намести и вториот гол на Сар во 25. минута за 2-0. Во финишот на полувремето Нуњеш намали на 2-1 и ги врати шансите на англискиот првак. Второто полувреме му припадна на тимот на Пеп Гвардиола, но неговите избраници удрија во бедемот на ривалот. Концентрацијата почна да попушта во финишот, најблизу до гол беше младиот Орајли, ама дефанзивците на Тотенхем спасија од гол-линија. На крајот Тотнем се радуваше на место меѓу осумте најдобри.
Манчестер Јунајтед победи откако му врачи отказ на Ерик Тен Хаг и тоа со убедливи 5-2 против Лестер. Водени од Руд Ван Нистелрој кој е привремено решение „црвените ѓаволи“ беа сигурни против „лисиците“. Двојна предност на „Олд Трафорд“ донесоа Касемиро и Гарначо, пред Ел Ханус да намали на 2-1. Следеше блиц-криг и два гола на Бруно Фернандеш и повторно Касемиро, а до полувремето Коуди намали на 4-2. Точка на победата стави капитенот Бруно во вториот дел со својот втор гол.
Њукасл успеа да слави во една од дерби пресметките против Челзи (2-0). Александар Исак донесе водство, а потоа Алекс Дисаси сам си ја стресе мрежата. Двата гола паднаа во првиот дел, па мрежите мируваа до крајот.
Ливерпул во вториот дел го скрши отпорот на Брајтон и слави со 2-3. Коди Гакпо постигна два гола за предност од 0-2, следеше погодокот на Адингра за 1-2 пред Луис Диаз да зголеми. Поразот на „галебите“ го ублажи Тарик Лампти.
Сигурен до четвртфинале беше Арсенал на гости кај Престон (0-3). Габриел Хесус и Итан Нванери донесоа предност во првиот дел, за потоа Каи Хаверц да стави точка на победата.
Изненадување приреди Кристал Палас во Бирмингем совладувајќи ја Астон Вила со 1-2.