Првиот човек на Ла Лига, Хавиер Тебас вели дека Килијан Мбапе во Реал Мадрид е 99% завршена работа, и верува дека Французинот ќе помогне да се зголеми атрактивноста на шпанското првенство.
И покрај тоа што нема ништо официјално, се појасно е дека Реал Мадрид ќе биде новиот клуб на Килијан Мбапе.
„Убеден сум дека Килијан Мбапе ќе пристигне во Реал Мадрид, мислам дека 99% е завршена работата“ – вели првиот човек на Ла Лига, Хавиер Тебас.
„Мислам дека ниту еден друг клуб од Европа не може да му го понуди она што му го има понудено Реал Мадрид, ова го кажувам од она што го имам слушнато и прочитано“.
Тој потоа изрази надеж дека Французинот ќе помогне да се зголеми атрактивноста на шпанското првенство.
„Продолжуваме и ќе продолжиме да билежиме прогрес, но сигурно неговото пристигнување ќе биде голема работа“.
„Сепак, во прашање се многу аспекти, не се само фудбалерите важни за успешноста на едно првенство“.
„На пример, Роналдо се пресели во Јувентус и Серија А не експлодираше. ПСЖ ги имаше Меси, Нејмар и Мбапе, но Лига 1 не беше толку многу успешна“.