Дејан Кулушевски конечно се врати на фудбалските терени по долгата пауза поради тешка повреда на коленото, а неговото враќање во дресот на Тотнем го опиша како посебен момент што го променил и како човек.
Шведскиот репрезентативец ги одигра првите минути по дури 526 дена отсуство, влегувајќи во игра во 86. минута од натпреварот против Ковентри Сити. Тотнем го доби дуелот со 3-1, остварувајќи ја првата победа во новата сезона од Премиер лигата.
Кулушевски последен пат настапи на 11 мај 2025 година, кога заработи сериозна повреда на коленото. Следуваше долг и напорен период на рехабилитација, исполнет со физички предизвици и психолошки борби. Сепак, фудбалерот смета дека сето тоа му помогнало да созрее и да добие поинаков поглед на животот и кариерата.
„Многу сум благодарен што морав да поминам низ ова. Сега сум подготвен за фудбал. Се гледам себеси поинаку. Мислам дека сум друг човек. Сè уште сум истото момче кое сака да игра фудбал, но сега сум малку попаметен, па затоа сум среќен“, изјави Кулушевски за „Скај Спортс“.
Поранешниот играч на Јувентус не го крие задоволството што конечно му се врати на она што најмногу го сака. Долгото отсуство, како што открива, било голем тест за неговата издржливост, но и период во кој научил многу за себе.
„На сите ќе им раскажувам за ова патување. Тоа беше неверојатно искуство, иако понекогаш беше тешко. Всушност, тешкотиите се нешто убаво“, порача шведскиот фудбалер.