Џејмс Милнер помина осум сезони во Ливерпул и беше еден од клучните играчи на тимот кој под водство на Јирген Клоп ја освои Премиер лигата, Лигата на шампионите, ФА Купот и Лига купот. Англискиот играч за врска го напушти клубот во 2023 година, една година пред заминувањето на Клоп, а сега откри детали од соработката со германскиот стручњак.
Милнер е рекордер по бројот на настапи во Премиер лигата (658), како и по бројот на години поминати во највисокото англиско натпреварување (24). Во текот на осумте години во Ливерпул, како универзален фудбалер одигра 332 натпревари, постигна 26 и асистираше за 46 гола.
Милнер за Клоп зборуваше во подкаст со Пол Сколс и Ники Бат. Како една од неговите најголеми квалитети ја истакна автентичноста и објасни дека однесувањето на Клоп не се менува зависно од тоа дали се вклучени камерите.
„Мислам дека кај Јирген е одлично тоа што е автентичен. Некои луѓе се различни пред камерите и зад нив, но тој секогаш е ист. Полн е со енергија, а во сè што правиш поставува исклучително високи стандарди и барања.“
Токму тие стандарди, според зборовите на Милнер, ја одбележале ерата на Клоп на „Енфилд“. Тој се присети на моментот по поразот од Ватфорд, кога тимот се враќал од гостувањето во пресрет на клупската божиќна забава.
„Сите бевме нерасположени, а тој рече дека сè што правиме, го правиме и за сите луѓе во клубот. Ако тренираме, тренираме најдобро, ако играме, играме најдобро, ако се забавуваме, се забавуваме најдобро“, зборуваше Милнер.
Зад енергијата на Клоп и блискиот однос со фудбалерите, сепак, стоел исклучително напорен систем на работа. Милнер вели дека адаптацијата била особено тешка за новите играчи.
„Има одлични стандарди и тоа е заразно. Тренинзите беа многу тешки, особено за оние кои штотуку ќе пристигнеа. Луѓето повраќаа покрај теренот. Беше немилосрден“, додека англискиот ветеран.