Путин ќе може да гласа за нов претседател на Црвена звезда

Рускиот претседател Владимир Путин ќе има можност да гласа на претстојните претседателски избори во Црвена звезда, кои ќе се одржат на 22 и 23 мај.

Право на глас ќе имаат сите активни членови на белградскиот клуб со подмирена годишна членарина, а според конечниот избирачки список што го потврди Изборната комисија, меѓу нив се наоѓа и името на Путин.

Членската карта на рускиот лидер е заведена под реден број 20 и му била издадена во 2011 година, за време на неговата посета на клубот.

Тогаш Путин присуствуваше на пријателскиот натпревар меѓу младинските состави на Црвена звезда и Зенит Санкт Петербург на стадионот „Маракана“, каде беше поздравен со овации од трибините. Од раководството на клубот доби и дрес со бројот 1.