Арсенал се пласираше во полуфиналето на Лига на шампиони, но и покрај одличните резултати, критиките за стилот на игра не престануваат.
Тимот на Микел Артета го елиминираше Спортинг Лисабон во четвртфиналето, но без посебно импресивен настап, што повторно ги отвори дилемите околу претпазливиот и дефанзивен пристап на лондончани. Привремениот капитен Деклан Рајс порача дека тимот не се оптоварува со коментарите од јавноста.
„Фрустрирачки? Не, штотуку стигнавме до полуфинале, максимално сме позитивни. Кого го интересира што мислат луѓето? Сѐ што е важно е што мисли оваа група, што мисли менаџерот. Ние сме во ново полуфинале. Воодушевен сум. Ќе продолжиме да играме добро и да ги поместуваме границите. Да даваме сѐ од себе“, изјави Рајс.
Сепак, призна дека постојат проблеми во нападот, откако Арсенал постигна само 3 гола на последните 5 натпревари во сите натпреварувања.
„Повеќето тимови против нас играат во формација 5-4-1. Секој противник се поставува со петмина во одбрана, па нема многу простор. Мора да најдеме начини да даваме голови, но играме против врвни тимови секоја недела. Ако не играте добро, прифатете дека луѓето ќе претераат со критиките и продолжете понатаму“, додаде Рајс.
Во полуфиналето Арсенал ќе се судри со слична филозофија, бидејќи ривал ќе му биде Атлетико Мадрид.