Легендата на Манчестер јунајтед, Пол Сколс вели дека Педри е неговиот „Нов омилен фудбалер“, откако го гледаше синоќешниот натпревар помеѓу Њукасл и Барселона во Лигата на шампиони.
„Каталонците“ синоќа триумфираа со 1-2 на гостувањето на „Сент Џејмс Парк“, Маркус Рашфорд блесна со два гола и донесе победа за шампионот на Шпанија.
Но клучни за победата беа и Педри и Френки де Јонг, кои ја контролираа играта и ја поврзуваа дефанзивата со нападот.
Шпанецот со својата партија ги одушеви и навивачите на Њукасл, како и Пол Сколс, кој во свое време важеше за еден од најдобрите фудбалери од средниот ред.
Легендата на Манчестер јунајтед на социјалните мрежи постираше фотографија од Педри и напиша: „Мојот нов омилен фудбалер“.
Педри натпреварот го заврши со 84 прецизни додавања од 92, и ниту еднаш не му беше одземена топката.
Импресиониран од играта на Педри и Де Јонг беше и Џек Грилиш, кој напиша: „Задоволство е да се гледаат“.
Доколку сте ја пропуштиле маестралната партија на Педри, на социјалните мрежи има две минутна компилација од неговиот настап против Њукасл во која можете да уживате.
Pedri Gonzalez vs Newcastle United@Pedri pic.twitter.com/zX4ZninIye
— 🕊️ (@MagicalXavi) September 18, 2025