Реал Мадрид излезе со соопштение по повод последната изјава на првиот човек на Ла Лига, Хавиер Тебас кој го нападна кралскиот клуб по дербито со Атлетико Мадрид.
Тебас веќе долг период е во војна со Реал Мадрид, претседателот на Ла Лига имаше многу замерки за однесувањето на кралскиот клуб по мадридското дерби.
Сега Реал го возвраќа ударот. Соопштението ви го пренесуваме во целост:
„По повод изјавите на претседателот на Ла Лига, Хавиер Тебас Медрано, Реал Мадрид сака да го изјави следново:
Нашиот клуб смета дека е недозволиво претседателот на Ла Лига да ја користи својата институционална позиција за постојано да го омаловажува и напаѓа Реал Мадрид на начинот на кој го прави тоа во секој свој јавен настап. Многу е загрижувачки што оној кој има одговорност да ги застапува и штити интересите на сите клубови во Ла Лига, продолжува повторливо да биде опседнат со Реал Мадрид, претворајќи го нашиот клуб во постојана мета на неговите јавни напади.
Неговиот последен истап е особено сериозен и неразбирлив, сосема недоличен за еден одговорен раководител, бидејќи тоа го прави коментирајќи статија на независен новинар во дигитален медиум. Притоа, тој реагира против нашиот клуб, дозволувајќи си дополнително да ја оценува нашата спортска стратегија — нешто што претставува тотален и неодговорен апсурд.
Целосно изненадувачки е тоа што претседателот на Ла Лига го посветува своето време и своите приватни канали секогаш во обиди јавно да го дискредитира Реал Мадрид, наместо преку одговорноста на својата функција да придонесе за градење доверба во институциите кои мора да ја гарантираат непристрасноста на натпреварувањето. На тој начин, тој продолжува да му штети на угледот на нашето натпреварување и на шпанскиот фудбал во светот.
Имајќи го предвид ова несоодветно и континуирано однесување, сметаме дека на професионалното фудбалско натпреварување во Шпанија итно му е потребен лидер способен да управува со него и да го развие сиот негов потенцијал, почитувајќи ја основната должност за неутралност. Потребен е некој што ја разбира природата на својата функција, бидејќи претседателот на Ла Лига не е сопственик на натпреварувањето, туку раководител во служба на клубовите што го сочинуваат и кои му го доверуваат управувањето. Ние, клубовите, имаме потреба од некој што чесно ќе ѝ служи на оваа мисија“, се вели во соопштението.