Информациите велат дека ПСЖ влегува во трка со Арсенал за крилниот офанзивен играч на Реал Мадрид, Родриго.
Родриго е на излезна врата од Реал Мадрид, тоа почна да се чувствува во финишот од минатата сезона, а со доаѓањето на Чаби Алонсо работите за Бразилецот не се променија.
На Светското клупско првенство тој доби нормална минутажа само на првиот натпревар, потоа едноставно исчезна и не се изнаигра. Нешто што сугерира дека Алонсо нема да смета на него, а Реал би го продал ако ја добие бараната сума.
Како сериозно заинтересиран за Родриго се споменуваше Арсенал, наводно Артета сака да го донесе Бразилецот во своите редови и покрај тоа што Сака игра на истата страна.
Реал Мадрид го проценува Родриго на 80 милиони евра, а последните информации велат дека во трката се приклучува и ПСЖ.
ПСЖ има голема финансиска моќ, сопствениците се добро расположени по освоената Лига на шампиони и со задоволство ќе му исполнат некоја од трансфер желбите на Луис Енрике. Дали тоа ќе биде Родриго, останува да се види. Работите ќе зависат и од желбата на фудбалерот.