За разлика од мечот со Динамо Загреб, Тотнем против Астон Вила одигра на многу повисоко ниво. Имаше контрола во текот на целиот натпревар, постигна два гола, имаше уште неколку шанси и не дозволи противникот да создаде ниту една посериозна можност.
Тотнем играше пожртвувано, фокусирано, сериозно, нешто што го немаше на дуелот против Динамо Загреб во кој влегоа како веќе да победиле.
„Ова беше одлична реакција, од една страна треба да бидеме многу среќни со тоа, но од друга страна мислам дека треба да бидеме тажни со тоа. Бидејќи кога гледате дека сте можеле да играте со такво срце, со таков однос, со таков глад за успех мислам дека треба да бидеме тажни, бидејќи тоа не го направивме пред два дена“, вели Мурињо.
„Следен предизвик е овие атрибути кои ги покажавме денеска да ги имаме секогаш. Секогаш како луѓе, како фудбалски луѓе треба да го покажуваме тоа, а не само како реакција на некој неуспех. Ова е спорт, ние секогаш ќе губиме натпревари, секогаш ќе имаме лоши перформанси, но никогаш, никогаш не смееме да имаме лош тимски дух, лоша посветеност, лоша ангажираност, лош пристап… па предизвик е секогаш да го имаме тоа што го видовме денес“.