Ливерпул сигурно чекори кон титулата во Премиер лигата, но на „Енфилд“ веќе се прават планови за следната сезона. Според англиските медиуми, Арне Слот има јасна визија за реконструкција на тимот, а еден од првите потези би можел да биде замена во нападот.
Дарвин Нуњез се очекува да го напушти клубот на лето, а „Дејли Мирор“ пишува дека неговата замена би можел да биде Брајан Мбуемо од Брентфорд.
Камерунскиот репрезентативец, кој веќе подолго време е на радарот на Арсенал, сега е и на листата на желби на Ливерпул. Се верува дека 25-годишникот одлично би се вклопил во офанзивната линија заедно со Мохамед Салах, Луис Дијаз и Диого Жота.
Мбуемо има импресивна сезона во Премиер лигата со 18 постигнати голови, а под договор со Брентфорд е до летото 2027 година. Сепак, медиумите од Островот пишуваат дека клубот е подготвен да го пушти за сума од околу 60 милиони евра – износ кој не претставува пречка ниту за Ливерпул, ниту за Арсенал.
Фудбалерот се приклучи на Брентфорд во 2019 година од Троа, и досега има запишано 237 настапи во дресот на „Пчелите“.
ФОТО/PHOTO: Brentford FC/Twitter