Тренерот на Манчестер Сити, Пеп Гвардиола, остро ја критикуваше Премиер лигата поради распоредот на натпреварите во завршницата од сезоната, откако неговиот тим треба да одигра натпревар само 72 часа по финалето на ФА Купот против Кристал Палас.
„Граѓаните“, кои се наоѓаат на шестото место со натпревар помалку од директните конкуренти Челси и Астон вила, ќе се соочат со Бормут во вторник, тим кој се бори за пласман во Европа. Сити има само бод помалку од двете екипи над него и секој бод е клучен во битката за позиција која носи во Лигата на шампионите следната сезона.
„Се бориме против вакви ситуации девет години, секоја сезона, и ништо не се менува“, изјави Гвардиола на прес-конференцијата во петокот.
„Ќе играме во вторник навечер против една од најинтензивните, физички најсилни екипи во лигата, Бормут. Тие играат за место во Конференциската лига или евентуално во Лига Европа. Ќе биде тешко.“
Гвардиола го посочи и примерот со Тотнем, чиј натпревар против Астон вила беше поместен од недела во петок за да имаат повеќе време за подготовка пред финалето на Европската лига против Манчестер Јунајтед следната среда.
„Премиер лигата донесе добра одлука, навистина добра. Ние цело време игравме во среда, па веднаш во сабота… не ни беше даден тој дополнителен ден“, истакна Каталонецот со доза на иронија.
Коментарите на Гвардиола повторно го отвораат прашањето за натпреварувачкиот календар и дали водечките екипи добиваат фер третман во клучните моменти од сезоната.