Фудбалската федерација на Македонија одбива да направи промени во статутот и да го прилагоди на законот за спорт во Македонија. Поради тоа Агенцијата за млади и спорт нема да го признае резултатот од утрешното Изборно собрание на кое Муамед Сејдини треба да добие нов мандат.
„Почитувани,
Ја известуваме јавноста дека Агенцијата за млади и спорт нема да ги признае резултатите од Изборното Собрание на Фудбалската федерација на Македонија (ФФМ) коешто ќе се одржи утре и нема да учествува со свој претставник.
АМС како единствено владино тело коешто е надлежно за работите од областа на спортот и вршење надзор над спроведувањето на одредбите од Законот за спорт, веќе подолго време бара усогласување со Законот за спорт, а ФФМ и покрај бројните укажувања, продолжува да функционира спротивно на законот и позитивното право во државата.
ФФМ подолг период ги игнорира и одлуките на надлежните институции и продолжува со непочитувањето на Законот за спорт и покрај инистирањето на АМС.
Иако се покренатите институционални и судски постапки, ФФМ продолжува да функционира и да делува спротивно на Законот за спорт и позитивното право во државата.
Имајќи предвид дека мандатите на делегатите, комисијата за избори, претседателот и членовите на УО на ФФМ, истекуваат на 17.02.2021 година, АМС известува дека нема да биде признаен незаконски избор на делегати од ОФС, како и избор на тела во ФФМ.
Законот за спорт важи за сите подеднакво и сите учесници се должни да го почитуваат.
Имаме поддршка од поголемиот број на клубовите од прва и втора лига за доследно почитување и примена на Законот за спорт.
Напредокот на спортот е возможен само со заеднички напори и почитување на законските регулативи“, стои во соопштението на претседателот на АМС, Наумче Мојсовски.