Петта тренерска смена по пет рунди во ПМФЛ!

Прволигашките клубови во Македонија на стартот на сезоната покажаа дека немаат премногу трпение кон тренерите, па така по пет одиграни кола дојде до петтата смена.

Александар Таневски повеќе не е предводник на новиот прволигаш Беса, потврди клубот преку социјалните мрежи. Минатата сезона со Таневски на чело тимот беше првак во ВМФЛ и избори историски пласман во елитата. Сепак, на стартот на првенството Беса има по една победа и реми, со три порази и е при дното на табелата.

Четирите бода во првите пет рунди не беа доволни и Таневски го плати цехот за резултатите.

Претходно во ПМФЛ од стартот на сезоната двапати тренери менуваше Вардар во имињата на Михаилов и Петрески, а по еднаш Шкупи (Османи) и Брера (Круљ).