Фудбалската репрезентација на Македонија ќе ѝ гостува на Босна и Херцеговина во пријателски натпревар. Нашата селекција на оваа средба во Сараево допатува со доста изменет состав, шест дебитанти во тимот и уште неколку повратници во составот.
На прес-конференцијата пред натпреварот своите очекувања ги сподели селекторот Гоце Седлоски.
„Сакаме да се докажеме тимски и резултатски. Најважно е да излеземе и да одиграме најдобро што можеме. Ќе дадеме максимум, нека победи подобриот. Ние си ја гледаме својата работа како да ги одиграме овие 90 минути, но и Босанците имаат амбиции да се покажат во вистинско светло пред своите навивачи. На Босна ѝ посакувам да одигра добро на Светското првенство. Секоја чест, ја исфрливте Италија исто како и ние во претходниот бараж, ама ова сега е нешто ново и мора да се докажуваме.
За нас нема пријателски, ќе излеземе на теренот да се претставиме во вистинско светло и да победиме ако може. Сакам да се подготвам за Лигата на нациите на најдобар можен начин. Се надевам дека нападот ќе проработи кај нас. Кога сум работел и на клупски план, никогаш не сум сакал да губам. Играме со силни репрезентации, Босна и Херцеговина и Турција. Ќе настојуваме да дадеме гол, но зависи дали ќе ни дозволи противникот. Мора да бидеме компактни, играчите се подготвени и задоволен сум од сработеното. Новите кои дојдоа се покажаа како вистинско освежување, а останатите добро ги примија во тимот. Повикав повеќе нови играчи, на сите ќе им дадам шанса, а на нив е да се докажат. Дури и на утрешниот натпревар, дел од новајлиите ќе го почнат натпреварот.
Како сите играчи, така и Елези играше добро во Сараево. Се најде на списокот, имаме два натпревари и ќе добие шанса. Не е само тој новина во однос на март, повикав многу играчи од Македонија и од други лиги. Се надевам дека се доволно квалитетни да играат во националниот тим. Имам неколку варијанти за замена на повредениот Барди, меѓутоа ќе одредам по денешниот тренинг.“, изјави Седлоски.
Натпреварот меѓу Македонија и Босна и Херцеговина е закажан за в петок во терминот од 20:30 часот на стадионот „Кошево“.