Поранешниот селектор на македонската фудбалска репрезентација, Игор Ангеловски, и официјално е промовиран како нов предводник на националниот тим на Таџикистан, кој ќе го води на претстојниот Азиски куп следната година.
За популарниот Мрме, ова е прв ангажман на селекторска функција по заминувањето од клупата на Македонија.
На промоцијата Ангеловски се заблагодари за приемот и поддршката од Фудбалската федерација на Таџикистан.
„Сакам да му се заблагодарам на раководството на Федерацијата за топлиот пречек. Од самиот почеток ја чувствувам довербата и поддршката од сите во организацијата“, изјави Ангеловски.
Во неговиот стручен штаб ќе бидат и неговите долгогодишни соработници, Милан Илиевски и Иван Јовановски. Илиевски ќе ја извршува улогата на асистент-тренер, додека Јовановски ќе биде задолжен за физичката подготовка на репрезентативците.
Новиот селектор порача и дека е подготвен да ја преземе целата одговорност за резултатите на тимот.
„Ова е нов и голем предизвик за мене. Ако има критики, тие нека бидат упатени кон мене, а не кон играчите или Федерацијата. Свесен сум за тежината на функцијата и ќе направиме сѐ за да ги израдуваме навивачите и достоинствено да го претставиме Таџикистан на меѓународната сцена“, истакна Ангеловски.