Нејмар повторно се најде во фокусот на јавноста поради контроверзно однесување, кое може да донесе сериозни последици за неговата кариера, особено во репрезентацијата на Бразил. Ѕвездата на Сантос е под истрага поради реакции кон судијата Савио Переира Сампајо по натпреварот со Ремо, и покрај победата од 2-0.
„Секогаш е исто… неправедно е. Ме соборија одзади и ништо не беше досудено. Само му пријдов да се пожалам и му реков: „Дали си луд?“, но ме игнорираше. Мислам дека станал на погрешна нога“, изјави Нејмар.
Бразилецот веќе заработи суспензија за следниот натпревар против Фламенго поради жолти картони, но дисциплинските органи на Бразилска фудбалска конфедерација разгледуваат дополнителна казна која може да достигне и до 12 натпревари.
Овој инцидент доаѓа во период кога Нејмар се обидува да ја стабилизира формата, но ваквите ситуации сериозно го доведуваат во прашање неговото враќање во националниот тим. Доколку биде суспендиран на 12 натпревари, со сигурност селекторот Карло Анчелоти ќе го изостави од бразилскиот тим за Мундијалот.