Шпанија секогаш е фаворит против Украина, но сега беше уште поголем поради проблемите со кои се соочуваше домаќинот во пресрет на овие натпревари. Недостаток на играчи од првиот тим поради коронавирусот.
Но Украинците направија големо изненадување, со гол на Циганков во 76. минута победија со 1-0.
Шпанија беше подобра селекција, создаде повеќе шанси за гол, но не успеа да ја затресе мрежата на противникот.
Интересно беше на мечот меѓу Германија и Швајцарија кој заврши 3-3, Германците не водеа во ниту еден момент од натпреварот.
Швајцарија тргна силно, со голови на Гаврановиќ и Фрулер поведе со 2-0. Вернер во 28. минута намали на 2-1.
По десет минути игра во вториот дел, Хаверц изедначи на 2-2, но само две минути подоцна Гаврановиќ донесе ново водство за Швајцарците. Сепак во 60. минута, Гнабри со пета реализираше за конечни 3-3.
Во мечевите од Лига Ц, Луксембург со 2-1 победи на гостувањето кај Црна Гора, Азербејџан и Кипар одиграа без голови.
Во Лига Д, Фарски Острови беа подобри од Андора, Малта со 1-0 победи на гостувањето кај Летонија, а немаше погодоци на дуелот меѓу Лихтенштајн и Сан Марино.