Натпреварот меѓу Леванте и Реал Мадрид го отвори прашањето во шпанските медиуми, „Што се случува со Герет Бејл?“.
Герет Бејл го постигна победничкиот гол за Реал Мадрид против Леванте, погоди од пенал, но зачудувачка беше неговата одлука да не се радува на погодокот. Велшанецот покажа незадоволство на својот лик, а и го одби неговиот соиграч Лукас Васкез кој тргна да го прослави голот со него.
Сантијаго Солари по мечот изјави дека се е во ред со Герет Бејл, но речиси никој не поверува во неговите зборови.
Новинарот на „АС“, Алфредо Релано во својата колумна однесувањето на Бејл го нарече срамно, и според него ова е почеток на крајот за арогантниот Велшанец на Сантијаго Бернабеу.
Заминувањето на Кристијано Роналдо беше шанса за Герет Бејл да излезе од сенката на Португалецот и да стане главен играч на Реал Мадрид, но не само што не се случи тоа, тој го изгуби и местото во првиот тим.
Погодокот со Леванте беше негов 13. оваа сезона, постигнува голови на задоволително ниво, но неговиот учинок во креирани шанси и дриблинзи е на ниско ниво. Не покажува перформанси кои се очекуваат од него.
Тој смета дека има нефер третман од фановите на Реал Мадрид кои му свиркаат оваа сезона, а смета и дека мадридските медиуми се против него.
Солари се почесто го става Бејл на клупата, тој ги преферира Лукас Васкез и младиот Винисиус Жуниор по крилните позиции. Тие му даваат енергија на тимот и имаат импакт каков што нема Герет Бејл оваа сезона.
И фудбалерите на Реал Мадрид го критикуваат Герет Бејл. Марсело јавно се шегуваше со способноста на Велшанецот да комуницира на шпански. Велат дека тој научил само неколку зборови од јазикот на земјата каде што игра. А Тибо Куртоа изјави дека Бејл не ни доаѓа на тимските вечери. Говорот на телото по погодокот со Леванте, само потврдува дека Бејл е разочаран, фрустриран и веројатно ги игра последните месеци во дресот на шпанскиот гигант.