Јувентус вечерва го пречекува Порто во реваш осминафинален меч од Лигата на шампионите. Португалскиот тим има предност од 2-1 по првиот натпревар, па само победа е опција за тимот на Пирло.
Кристијано Роналдо игра најдобро кога е најважно, Португалецот секогаш е максимално фокусиран на големите натпревари, а Пирло е свесен за тоа.
„Ова се натпревари на Кристијано Роналдо, секогаш го докажувал тоа. Тој имаше специјална тренинг програма овие денови и подготвен е за игра“, вели Пирло.
Алегри и Сари беа отпуштени по рана елиминација во Лигата на шампионите, но Пирло не стравува од отказ.
„Ако мислев на тоа немаше да бидам сега тука. Знам колку е важен овој натпревар, но фокусиран сум од меч на меч. Клубот ќе одлучи за мојата иднина во зависност од резултатите“.
„Работам од ден за ден, го знам мојот проект и клупскиот проект. Овој натпревар е како финале за нас. Треба да го свртиме дуелот, резултатот е отворен“.
„Ќе се обидеме да научиме од грешките кои ги направивме пред две недели. Го проучивме Порто, знаеме дека тие можат да користат различни системи“.
„Нема да го потцениме Порто, но знаеме дека можеме да се квалификуваме во следното коло. Мораме да мислиме дека можеме во четвртфиналето“.