Барселона вчера со победа од 1-2 на гостувањето во Ајндховен го запечати првото место во групата и си обезбеди место помеѓу носителите во ждрепката за нок-аут фазата.
Првиот гол беше дел на Лео Меси, кој уште еднаш покажа дека е фудбалски волшебник. Аргентинецот беше опколен од неколку противници, но и покрај тоа најде простор да бие на првата статива. Шутот го изненади голманот на ПСВ кој не се помрдна.
Со овој гол, Лео Меси испиша неколку рекорди. Тој го надмина постигнувањето на Кристијано Роналдо и има постигнато најмногу погодоци (106) во Лигата на шампионите во дресот на еден клуб.
Напаѓачот исто така стана и најдобар стрелец во групната фаза од Лигата на шампионите со 66 погодоци (на 66 натпревари). Аргентинецот забележа и еден личен рекорд, 13. сезона по ред тој постигнува најмалку 15 погодоци.