Клуб Бриж го шокира Интер со победата од 4-3 на „Џузепе Меаца“ во Лигата на шампионите, а во центарот на вниманието се најде Николо Тресолди. Младиот напаѓач постигна хет-трик против италијанскиот гигант, но приказната станува уште поинтересна кога ќе се знае дека тој е голем навивач на градскиот ривал Милан, кој исто така покажува интерес за неговите услуги.
Тресолди има 22 години и е роден во Каљари, Италија, но уште како дете неговото семејство се сели во Германија. Фудбалски се развиваше во академијата на Хановер, каде што дебитираше и за првиот тим во 2022 година. Во летото 2025 година направи трансфер во Клуб Бриж, каде што бргу се наметна како еден од најинтересните млади напаѓачи во Европа.
Посебна тежина на приказната ѝ дава неговата љубов кон Милан. Тресолди не ја крие приврзаноста кон „росонерите“, а пред дуелот со Интер добил бројни пораки од навивачите на својот омилен клуб, кои му посакувале да постигне гол и да победи. По натпреварот, самиот откри дека за него ова било нешто како дерби. Неговиот татко Емануеле претходно раскажа дека Николо се вљубил во Милан поради Кака, Филипо Инзаги и Алешандре Пато и дека никој не успеал да го предомисли. Според неговите зборови, големиот сон на младиот напаѓач е еден ден да го облече дресот на „росонерите“.
Ова лето интересот за Тресолди беше огромен, а меѓу клубовите што се поврзуваа со него се Барселона, Манчестер јунајтед и Борусија Дортмунд. Рома во текот на летото испрати понуда од 35 милиони евра, но Клуб Бриж ја одби, додека белгискиот клуб, според медиумските информации, го проценува напаѓачот на околу 50 милиони евра. Во Бриж засега има договор до 2029 година, а заинтересираните гиганти ќе мора да бидат подготвени за сериозна финансиска инвестиција.