Фудбалерите на Монца се радуваа на само третата победа во сезоната во Серија А, на гостувањето кај немотивираниот Удинезе со 1-2 (0-0).
По речиси пет месеци и дури 15 натпревари во низа на кои тимот од предградието на Милано забележа 13 порази, следуваше прво славје. Последен пат Монца триумфираше на 13 јануари дома против Фиорентина, а ова е втора гостинска победа.
Првото полувреме на „Фриули“ не донесе погодоци, а потоа на стартот на второто Капрари погоди за предност на гостите (0-1). Во продолжението Лоренцо Лука донесе израмнување за Удинезе, меѓутоа Кеита Балде беше херојот кој ја израдува публиката на веќе прежалениот гостин.
Монца оваа сезона е убедливо најслаб тим во Серија А, котира на последната позиција со 18 бода и веќе е второлигаш.