Интер и Милан одиграа возбудливо дерби кое заврши без победник 2-2, по едно полувреме имаа и двете екипи.
Милан подобро го почна мечот, имаше неколку шанси за гол, ја погоди и стативата, но откако не успеа да поведе, казната стигна.
Во 36. минута по асистенција од Галардини, Кандрева постигна гол за водство на Интер од 1-0.
Пред истекот на првото полувреме, Перишиќ одлично го пронајде Икарди кој го зголеми резултатот на 2-0, Интер со комотно водство замина на одморот.
Нероазурите го контролираа почетокот од второто полувреме и изгледаше дека без проблеми ќе дојдат до трите бода, но финишотму припадна на Милан.
Во 83. минута по нафрлување на Сусо, Ромањоли добро реагираше и го намали водството на Интер на 2-1.
Судијата покажа пет минути продолжение на натпреварот, но поради тоа што немаше многу активен фудбал реши да даде и дополнителни две минути за игра. Во 97. минута Запата постигна гол за нерешени 2-2 и голема радост на Милан.
По крајот на мечот Интер е тој што жали бидејќи пропушти водство од 2-0, Милан слави голем бод освоен пред самиот судиски свиреж за крај на мечот.