Во недела во вечерниот термин на Серија А се игра големото градско дерби меѓу Интер и Милан. Ромањоли за прв пат како капитен ќе го игра овој значаен дуел.
„Природно е дека како капитен чувствувате поголема одговорност, но покрај дополнителниот притисок, тоа ми дава поголема мотивација и го прави уште пофасцинантен предизвикот“, вели Ромањоли.
„Ние сме свесни дека овој натпревар може да ни даде екстра поттик за понатаму бидејќи освен што е дерби, Интер исто така е наш директен ривал за место во Европа“.
„Ова е дерби во кое има многу значајни елементи како традиција, стадион, навивачи… Сум добил некои дерби, други сум изгубил, трети завршиле нерешено, но тоа е фудбалот. Се надевам дека сега ќе победиме“.
„Треба да го играме нашиот стил, кога ќе ни се укаже шанса да реализираме и да го лимитираме нивниот напад. Најважно е да останеме фокусирани 95 минути“.
Дербито ќе биде и битка меѓу аргентинските напаѓачи, Мауро Икарди против Гонзало Игуаин.
„Добрата работа за Игуаин е тоа што ако му дадете половина шанса тој ќе даде гол. Големите шампиони го прават тоа, тој е голем шампион кој долго треба да ни користи“.