Фудбалската федерација на Шпанија (РФЕФ) е казнета со 20.000 долари поради антимуслиманските скандирања на навивачите за време на пријателскиот натпревар против Египет во Барселона.
Најголеми реакции предизвика скандирањето „Кој не скока, тој е муслиман“. Инцидентот се случи на натпреварот во март, а казната беше изречена денеска.
ФИФА во петокот соопшти дека одлуката за казната неодамна била потврдена од нејзиното жалбено тело, по првичната пресуда на тројца дисциплински судии.
Казната вклучува и мерки за трибините. На следниот домашен натпревар на Шпанија мора да бидат затворени 15 проценти од местата на стадионот, или тие места да бидат наменети за посебни групи, како семејства, студенти и организации што се борат против дискриминацијата.
Шпанија ќе ја отслужи казната на следниот пријателски натпревар, кој би можел да се одигра во јуни 2027 или во март 2028 година.
Во образложението на пресудата, дисциплинските судии наведоа дека строгите санкции биле неопходни, но притоа земале предвид дека ова е прв ваков прекршок на Шпанската фудбалска федерација. Тие истакнаа дека федерацијата брзо реагирала и го осудила инцидентот.
Пофалби добија и шпанските претставници поради превентивните мерки што ги презеле пред натпреварот, целосната соработка со судиите и надлежните органи, јавната осуда на скандирањето и напорите за идентификување на одговорните навивачи.
Натпреварот меѓу Шпанија и Египет се одигра на 31 март 2026 година и заврши без голови (0-0). Скандирањето подоцна го осуди и шпанскиот репрезентативец Ламин Јамал, кој е муслиман, оценувајќи го како непочитување и нешто што е недозволиво.
„Користењето на религијата за провокации на теренот ве прави неуки и расисти“, напиша Јамал во април на Инстаграм, иако тој не беше директна цел на навредите.
Инцидентот го осуди и шпанскиот премиер Педро Санчез, а полицијата отвори истрага поради исламофобичните и ксенофобичните пораки.